文：專案組

章子怡　巨星風範

「我喺影展撞過章子怡幾次，除咗覺得佢好有國際巨星風範之外，最記得就係每一個有佢出現嘅地方，現場一定會變得好混亂。其中一個幾難忘嘅係康城嘅《香港之夜》，章子怡一到，現場即刻陷入一片混亂，近百記者係咁搏命追住章子怡轉嚟轉去，仲有啲攝影師個個企晒喺櫈上面，個場面真係好誇張！當時我都冇諗住要走過去同佢做專訪，淨係扶實我哋攝影師企住嗰張櫈，因為我驚佢跌落嚟整親自己，始終安全緊要啲。」

安祖蓮娜祖莉　一見難求

「當年祖莉有份聲演嘅《Shark Tale》喺威尼斯舉行全球首映禮，全球只有六十間媒體可以現場採訪，我哋為咗爭取香港媒體嘅獨家採訪權，由到埗嗰日起日日去嗰間電影公司嘅辦公室度等消息，佢哋終於批咗個採訪證畀我哋，嗰一次真係比中咗六合彩頭獎更開心！」

雲妮絲維嘉　親切難忘

「喺影展要同荷里活影星做專訪係好困難嘅事，由申請到做到嗰日，起碼等成幾個月。當年我好幸運有機會做到《擊動深情》嘅專訪，我同雲妮絲維嘉只係做咗十分鐘專訪，估唔到喺之後嘅首映度佢竟然認得我，仲主動叫我個名兼同我打招呼，令我好難忘！」

昆頓塔倫天奴　幽默有緣

「我覺得我同昆頓塔倫天奴幾有緣，有次我去康城影展，佢係嗰年嘅主席評審，又咁啱去到邊度都撞到佢，唔知係咪因為我每次撞到佢都好開心，佢竟然認得我，仲喺紅地氈度同我打招呼，之後我哋喺派對又撞到，佢話好鍾意中國女仔，估唔到佢咁幽默同親切！」