容祖兒（Joey）入行10年，她將於下月4日假香港文化中心大劇院，舉行《Joey Yung PERFECT 10 LIVE 2009》音樂會。她表示媽咪將過往10年的剪報儲起，合共七大箱：「有張相比較深刻，5、6年前我喺內地做騷，畀人影到『大龍躉』，配合埋低炒，估計Pat Pat達40吋，令我無時無刻都提醒自己，曾經有過驚心動魄嘅一刻！」

Joey坦言是次音樂會挑戰體能極限，她於一日內舉行下午場及夜場：「我唔擔心體力，因為冇激烈舞蹈，但接受觀眾熱烈嘅掌聲！」為養好聲線，她已戒吃煎炸食物及多喝水：「依家每日練歌，開動唱歌引擎！（一日開兩場？）係一個計謀，想將個騷變得矜貴啲，我哋會將啲歌重新編曲，務求精英化！（點解揀文化中心？）當年參加歌唱比賽就喺呢度，好有感情，又可以同大家近距離接觸，當集體回憶！」

門票七分鐘售罄

此外，Joey首度推出限量版Deluxe Boxset預售票及海報，除新歌EP、絕密私相簿、全新造型寫真、海報及神秘DVD外，還有會場限定版粉紅色USB手指。由於個唱門票七分鐘內火速售罄，據知主辦單位考慮開放「企位」，現正與會場磋商，詳情待落實後公布。

文：專案組　攝：黎志輝