由李家誠及張王幼倫籌辦的《Music First慈善行動》，昨日在香港理工大學舉行慈善音樂會，晚上則在The Mira舉行38圍盛大晚宴，場地仿劍橋大學校園設計，出自名師Colin Cowie手筆。
昨日徐子淇偕同夫婿出現，同場尚有何超雲及趙式明等。現場所見，子淇似乎又消瘦了，但她表示是裙身設計的錯覺。問到李家誠會否怕她太瘦？他說：「依家最啱，不過都驚佢太瘦，要佢食多啲嘢。」至於他是否需要減磅？子淇搶着說：「你哋唔覺佢瘦咗咩？平時到夜晚十一、二點，佢都會做跑步機，做運動係為健康，唔係為咗瘦，平時一家四口會齊齊游水，囡囡要用水泡，唔敢放個頭落水，佢冇乜運動天分！音樂天分高啲。」
子淇又表示因小時候考琴時未能彈奏心愛的歌曲，故現在不會強迫女兒學樂器：「每樣嘢唔好只睇有冇天分而學，好似我細個會走音同拍子唔準，學吓學吓依家八音都全，我平時都有彈啲兒歌畀囡囡聽，但我想佢學豎琴，到時我哋兩個一齊彈會好得意！」