曹側的「街頭毆鬥」事件自本報獨家披露後熱爆全城，側田昨晚擔任林敏驄《林敏聰好歌好友演唱會09》表演嘉賓，當介紹側田出場時，阿驄特意戴帽及搞爛Gag：「呢頂帽有名堂，叫『小偷阿驄』，打風都打唔甩。但今時今日打風打唔甩唔夠，最緊要打交都打唔甩。但都係唔好講呢啲，陣間畀人警告。」

側田雖然被寸「打交唔甩帽」，但全晚心情靚爆！

側田和林敏驄攬到實，十分老友！

直到晚上十時十五分，側田終於現身，穿上黑色西裝、打呔、頭戴冷帽的他，惹來全場起哄。阿驄即慰問他有沒有事，側田則微笑說：「冇嘢，重要部位冇事，多謝關心，最重要大家支持。」他笑言愛聽側田唱歌的阿驄，再次以師兄身份慰問側田，又自爆前一晚拿側田下體受傷作笑料的他，更笑指側田不會用下體吃飯，又揚言與側田交換帽戴，嚇得側田尷尬傻笑說：「我以為你會放過我添！」玩得興起的阿驄，更扮曹格李小龍上身問側田：「我似唔似曹格？」又說不能讓側田與路牌「相遇」，嚇得側田說：「好多嘢唔方便講！」即遭阿驄取笑：「乜你成個女人咁，每個月都有啲唔方便。」

90度鞠躬致歉

阿驄繼續咬住不放：「側田係好人，好人先至畀人蝦，呢個人控制唔到自己。」側田即緊張維護曹格：「呢個係你個人意見。」阿驄即抵死回敬側田：「佢擺明蝦你，又唔見佢同成龍飲嘢叫成龍隻揪？」側田只懂傻笑。隨即阿驄讓側田在台上演唱《好人》，獲全場熱烈掌聲。側田演唱完畢後，更向觀眾作九十度鞠躬，甚有悔意。

側田向在場觀眾鞠躬道歉。	放大圖片	側田回應記者提問時雙手合十。

原本表示會接受傳媒訪問的側田，完成表演後即一支箭衝上保母車，但因太過混亂，有電視台攝影師被夾在保母車與垃圾桶之間，嚇得側田急忙下車了解兼讓傳媒拍照。一直保持微笑的側田，記者不停追問他的神奇帽（意指打極唔甩）很大回響？會否織髮等，他只笑而不答。而在旁的公司高層陳輝虹則說：「交咗畀律師處理。」至於會否向曹格追究事件，陳輝虹說：「阿田本身唔想追究，我哋都要同律師開會再研究，總之阿田未落口供。」完騷後，側田隨即驅車返回貝沙灣寓所。

而側田原定昨午5時往九展綵排，卻突然取消行程，要待晚上完成演出後才接受訪問。他於晚上八時半、在唱片公司工作人員陪同下準時抵達九展。而側田搭時，原本已關上的門突然打開，令現場一度起哄，場面搞笑！

鄭中基充耳不聞

而同公司的鄭中基與梁漢文於下午四時許抵達現場，問到有否慰問側田，鄭中基卻充耳不聞；問到有指側田因在金牌不開心而有意退出時，梁漢文慌忙表示要趕往化妝整頭：「我今日嚟做嘢，了解吓先。」

此外，阿驄前晚在演唱會第一場時，更拿側田的「男人最痛」開玩笑：「側田好擔心咁打畀我：『我今日嚟唔到，畀人踢傷下體要拎醫生紙，好似Eason咁傷！』跟住我話：『唔緊要，唱歌又唔係用下體，你唱歌用下體咩？』佢終於解開心結話嚟。」阿驄更笑言要製作《翡翠歌星大格鬥》的節目，兼指明要由曹格對側田。