琦琦早排成日同囡囡去港安醫院，問起佢就話係去打預防針。小小So之後同琦琦飲茶，問起佢同阿女打乜預防針，佢先同小小So講暑假時同囡囡去咗北京玩，唔小心被動物咬親，咬咗阿女個左肩一啖，仲咬到入肉，琦琦話：「我當時嚇到個心都跳咗出嚟，眼淚水不停咁流！即時送佢去醫院，阿女初初都有喊，見到我個樣好驚，佢反而安慰番我，叫我唔好驚。」
琦琦嘅囡囡一向好勇敢，今次小小So更加要讚一讚佢，五歲都未夠，被咬到依然可以咁淡定，一定係有佢父母嘅基因。但作為阿媽，個女被咬傷，佢就即時有陰影，琦琦同小小So講，以後都唔會再亂咁畀個女接觸動物，始終仲係細，有乜事就唔好。而為咗安全計，琦琦返咗香港之後，就同囡囡去打破傷風針，要分開打五針，唔怪得之前隔一、兩個星期就見佢同囡囡去醫院，依家總算打晒針又冇事，終於安樂晒！