陳貝兒昨日出席活動時，被問到由bma舉辦的曹格十一月的個唱是否將會取消時，身為bma市場推廣部副總裁的她說：「依家仲開緊會傾，公司遲啲會公布。覺得佢喺個勇於承擔嘅男人，佢喺北京特登飛返嚟開記者會，睇到佢真係誠意十足。」她又表示愛聽曹格的音樂：「好想個唱可如常舉行。（覺得要交代番件事？）咁佢唔講一定有佢原因，不過我自己就好想知，而作為一個同事及歌迷都會支持佢。」
梁靖琪：
我識得側田，唔識曹格。佢哋作為藝人咁做係唔啱，不過欣賞佢哋唔會為小小嘢而破壞友情。（影響形象？）形象一定受影響，不過記者會上，Feel到曹格好Sorry、好真情流露，最緊要肯去改。
Mr.：
如果我哋有爭拗，只會約埋打邊爐將啲唔開心嘅嘢喺個鍋內滾掉。每個藝人都有壓力，但我哋會自律，我醉咗只會發呆，最癲係阿Tom，佢會喪打鼓！（爭女？）冇，因為唔夠Ronny爭！
徐淑敏：
同佢哋兩個都唔熟，冇同佢哋一齊玩過，相信佢哋係好兄弟先會咁做，不過閂埋房門做會好啲，覺得曹格係好有義氣。（佢好火爆？）火爆嘅人先有義氣，呢啲我都識得好多。
鄧麗欣：
睇咗段片，起初都覺得好震驚，因為側田同曹格係好朋友。我所認識嘅側田，為人好溫馴，好錫身邊嘅朋友同家人。佢哋都知錯o架啦，以後唔好飲咁多酒囉。
范萱蔚：
作為公眾人物應該控制自己，唔應該喝太多，道歉交代係正確做法，我未試過飲醉酒，可能喝醉會除衫都唔定！
麥家瑜：
我酒量唔好，飲酒時會節制，到咁上下會停，因唔知醉酒後會發生乜事，身邊嘅朋友亦會睇住我，唔畀我飲。