側田與好兄弟曹格大打出手，側田的緋聞女友黃欣、王淑玲及文頌嫻等紛紛與他劃清界線。
黃欣
「冇諗到A1咁大件事。（唔鍾意男友醉酒動武？）肯定唔鍾意。（扣分？）我同佢只係朋友，佢依家應該好忙同好多嘢搞，晏啲SMS佢，唔會八卦，等佢自己交代件事。（有冇見過曹格？）有。（同側田一齊玩時見過？）總之一大班朋友。（勸佢減少夜蒲同戒酒？）少飲為妙，咁大個人識控制自己，相信佢識處理同取捨。（有咩提議令佢挽回形象？）應該專注事業。」
江若琳
「開頭以為係拍戲，跟住見係港聞，原來咁大件事，我同曹格合作過，知佢同側田係好兄弟，應該打完交就冇事。」
王淑玲
「自從舞台劇版《志雲飯局》之後我哋冇見過面，其實我哋唔係好熟，覺得佢哋都係玩吓，年輕人唔使咁認真。（對側田失望？）唔會！上次志偉嘅生日會上，見佢都冇飲醉，好清醒同人傾偈。」
文頌嫻
「我同側田完全唔熟，只係喺志偉嘅生日會見過佢，嗰晚佢有飲酒，不過佢好靜，冇醉酒或上身嘅情況出現。」
鄭融
「嚟緊會做曹格演唱會同音樂特輯嘉賓，認識嘅側田、曹格都係率直嘅人，佢哋喺埋一齊唔知會發生咩事，曹格又頑皮，不過佢哋同夫妻冇分別，床頭打交床尾和。（側田被踢重要部位？）小意思，過一陣就唔痛。」
