曹格與好友側田前日凌晨在街上大打出手後，當日下午接受新城《音樂通世界》錄音訪問，因打交事件曝光後，新城特別將訪問提前昨午播出。曹格在訪問中自爆昔日打交史，年少時在新西蘭的生活日子：「新西蘭係我學壞嘅地方，一開學打咗四次架，嗰陣得15歲，乜都唔驚，唔知死、唔怕死，屋企又冇人理，冇屋企人，成日自己飛來飛去，覺得與其畀人蝦，不如打咗你先，等人知道呢個中國人唔係咁易蝦。」
他更重提多次涉及打鬥事件的報道：「之前話我同人打交、入醫院嘅事，冇一次係真，冇一次關我事，根本唔關我事！」曹格坦言早前再被冤枉時，曾向台灣傳媒承認以前喜愛打交、脾氣不好，但已成過去式：「以前嘅曹格唔係今日嘅曹格，聽日嘅曹格亦唔係今日嘅曹格，希望大家畀機會我，以前做錯嘢，唔代表一世做錯。」
當中曹格多次說：「好耐冇打交亦唔會打交，好驚打交！」他又大談打交論：「李小龍話最好嘅防守就係攻擊，保護自己先要打低對方，呢個諗法係好，但唔係真係套用喺打交，係做事方式，要諗得快過人，諗得未來啲。」問到如何教導囝囝，曹格說：「冇畀人打過唔知驚，只會對佢講一定唔可以掂毒品，自己先係自己最好嘅老師。」