自從大熱門仝曉燕退選後，「翻版李嘉欣」王希瑤在港澳賽區可謂一枝獨秀。雖然有「波霸」（5）林紫君從後追趕，但瑤瑤新聞多多，加上34C「峰」頭一時無兩，大熱地位仍屹立不倒。
昨日一班亞姐身穿平腳設計的兩件頭泳衣，到九龍灣EMAX泳池出席《亞姐水上競技大比拼》活動。一直「胸」前盛放的瑤瑤，上圍竟突然離奇縮水！綜觀瑤瑤在過去一個月內的身材變化，上圍由最初「平平無奇」演變成驚為天人的「湯碗胸」，昨日又打回原形，「變幻球」之名可謂當之無愧，未知是否因近日的整容傳聞而特登收起性感。
拋金句耍太極
與（1）張加慧及（3）莫曉菲齊齊玩「划艇執波仔」的瑤瑤，雖然在台上不斷俯身拾球，但上圍始終未見如上回寫大字般突出，反而只有32吋上圍的莫曉菲搶盡「峰」頭。可能自知狀態欠佳，瑤瑤甫見記者即自爆患病博同情：「我之前感冒，依家好番啲，但仲有少少咳。（病咗仲落水？）冇所謂！大會好照顧我，有毛巾預備畀我。」曾在才藝表演中施展「金句王」絕技的瑤瑤，提到病情時再彈金句：「近排天氣凍，大家都保重呀！」可是現場環境翳焗，記者均汗流浹背，瑤瑤的「叮囑」認真莫名其妙。
問到是否因被指整容而「激病」，瑤瑤看來有備而來，她說：「唔會驚，反正都唔係事實。我有拎啲報道畀父母睇，佢哋都話唔認得我！阿爸仲攞番我細個啲相出嚟，都話唔係我。（話啲相唔係你定唔似你？）有啲唔係我囉！我同阿爸好似樣。」
鍾維愈幫愈忙
由於愈講愈離題，記者再追問她覺得那些照片不似自己，瑤瑤聽罷再耍太極：「模特兒公司好多時叫我做咩，我都會做到佢想要嗰個樣。（咁學生相係咪你？）唔知呀！唔係我！（認識相中同學？）我都唔記得喇！我讀過咁多間學校……我記性差，今日講完啲嘢，聽日都可以唔記得！（你會唔會連以前個樣都唔記得呀？）女大十八變嘛！蔡依林都七十二變啦！」當她知悉蔡依林也曾被傳整容及隆胸時，再扯開話題多謝化妝師力求解圍：「係咩？我淨係知佢曾經教過上圍變大三部曲咋！至於個鼻要靠化妝師，所以我要請佢哋食飯。」
另一佳麗（9）鍾維亦企圖力撐瑤瑤沒有整容，但愈幫愈忙：「可能人大咗會唔同樣，但我就覺得啲相似佢。我細個都有啲男仔頭，但個樣就冇變，係個感覺唔同咗。」亞姐港澳賽區將於周四淘汰四名佳麗，選出八位精英進入11月初的總決賽。