本文重點
曹卓榣（Cc）早前勇奪動漫節Image Girl選舉冠軍，當日她行騷時似模似樣，原來她自小已甫士多多兼坐唔定！她笑說：「我細細個影相時已經動作多多，媽咪都話我好識擺甫士！我真係坐唔定，周不時紮紮跳，成個男仔咁，每日都嘈住媽咪，一定要佢帶我出街玩！」
漏夜送入院
由於十分好動，經常「四圍擒」的Cc終於得到教訓：「記得我5、6歲左右，有一次貪玩擒梳化，結果成個人跌咗落地，左手手腕甩骹，痛到我勁喊！結果媽咪漏夜送我入醫院，自此唔敢再咁奀皮！」
可能是「動極思靜」，跌斷手骹後，Cc不再男仔頭，反而向另一嗜好進發：「自從整親隻手後，我冇再走嚟走去，反而叫媽咪買晒一Set玩具廚具畀我，一個人玩煮飯仔囉！」問到真正的廚藝如何？她尷尬地說：「玩就得，真係煮嘢就唔係好識！」