林依晨同鄭元暢（小綜）自從《惡作劇之吻》起合作無間，好多Fans當正佢哋係真情侶，連小綜嘅爸爸都好入戲！小綜同小小So講，佢同依晨4年合作咗3部劇，加埋宣傳活動，有段時間日見夜見，好到似一家人，仲見埋家長！不過小綜話同依晨只係好朋友，唔會發展成情侶，但鄭爸爸就當正依晨係鄭家新抱。
某年大除夕倒數，小綜接到爸爸電話，當佢準備同爸爸講新年快樂之際，爸爸竟然叫佢交個電話畀依晨聽，佢老人家要同新抱仔講「Happy New Year」。由於小綜當時正在登台，依晨唔在場，鄭爸爸惟有失望收線。點解鄭爸爸會打畀小綜搵依晨呢？原來鄭爸爸係依晨嘅Fans，每次小綜開工，佢就借故打電話畀個仔，其實係搵「新抱仔」傾吓偈，久而久之，小綜就成為爸爸嘅接線生！