周柏豪最近推出的新碟《FOLLOW》大獲好評，又被拍得與「翻版徐子淇」鍾浠文拍拖撐枱腳，可謂事業、愛情兩得意！日前他穿上印有大碟名稱的T恤接受訪問，並說：「只要出席新碟活動，都盡量着住佢，務必令所有人知道我出咗新碟。（多咗個Me字？）特登㗎！係叫歌迷跟隨住我。（你設計？）係呀！我同公司講，想有件印有新碟名嘅Tee，之後公司就搵人整。」他表示已特製多件打歌服：「怕洗唔切吖嘛！最終整咗十件左右！」不過，他竟被歌迷投訴：「佢哋問我點解唔整成歌迷會衫，我咪解釋畀佢哋聽，話只係用嚟宣傳囉！」