劉美君幫無綫主持《超級巨聲》已經有一段時間，佢經常以大姐姐身份安慰啲表現失準，又或者喊到收唔到聲嘅參賽者，「傻豬！唔好喊！」呢句嘢講到街知巷聞，小小So早排叫佢一聲「傻豬」，就令佢笑到趴埋牆！
劉美君：依家「傻豬」係好出名、好Hit嘅口頭禪，勁過當年發哥（周潤發）嗰句「唔係咩呀」。
小小So：唔明點解啲參賽者成日喊。
劉美君：係啦！之前我都真係感動，見佢哋咁努力，同佢哋喊埋一份，但係慢慢唔明點解會次次喊囉！你見我依家都冇喊啦！
劉美君雖然唔再喊，不過佢4歲嘅囡囡就可能想喊，因為《超級巨聲》會做到出年二月，媽咪聖誕新年都未必有假返美國探佢呢！
