年初因上無綫節目《美女廚房》而與方力申傳緋聞，因此人氣急升、工作冇停手的Rainbow，經常要「曠課」出席活動搵真銀，最終被學校以「犯校規」為由開除，與Rainbow情同姊妹的周凱盈（Monique）亦一齊退學，打算在娛樂圈闖一番事業。

孤伶伶返學

可惜好景不常，Rainbow近日工作量驟減，上周更被拍得重返校園，在旺角一間夜校返學。傍晚六時許，身穿貼身小背心的她，獨自在旺角一間大型文具店閒逛，她在店內揀選原子筆及File等文具，再在附近便利店買小吃和飲品充飢，邊行邊吃！其後，Rainbow走進旺角彌敦道一幢商業大廈內，記者在現場守候至晚上十時多，見她從大廈內走出即上前追問，Rainbow慌張地說：「我嚟呢度返夜校。」她透露夜校學費每個月要二千港元，每周上課五天，其中一日是專攻英文科，問到是否受外界壓力？她矢口否認：「唔係！我一直都堅持要讀埋中五，只係轉讀夜校啫！」

穿貼身背心的Rainbow，吸引男士行注目禮。

Rainbow專心揀選文具，為重返校園做好準備。

Monique意見分歧

至於由Rainbow帶挈入行的Monique並沒有跟隨返夜校，在記者明查暗訪下，得知她在炮台山一間日校中學讀書。上周五下午四時許，身穿整齊校服的Monique與一名同學到書店買書，期間兩人拿着新開學的書單仔細研究，排隊後才發現課本斷貨，最後冇癮離開。事後記者致電Monique，她坦言與Rainbow意見分歧：「我想返日校，但Rainbow就要返夜校！（屋企人畀壓力？）冇乜，反而最後一年（中五）想好好讀書！」

Monique（左）返學兩星期已認識新同學，經常出雙入對。

Monique（左）相約同學仔一起買書。