貴為「金句王」的黎明，繼以「虛偽論」回應與樂基兒已婚一事後，又以「K象人狗論」再帶記者遊花園。
黎明：「唔係唔肯講、唔交代，係要接受我嘅性格，地球有咁多唔同嘅人，每個人有唔同嘅生存方式，呢個就係我，多謝大家。（你叫樂基兒唔好答？）多謝大家，我已經講咗3次多謝，再講就好虛偽。」
「年輕人唔好諗可以控制藥物，K仔（氯胺酮）係強烈麻醉藥，係用嚟麻醉大象，唔係人食嘅，試諗吓人食狗糧會點？」
拆局：黎明婚後首度亮相公開場合，不過未肯承認已婚，就算傳媒同佢講「恭喜晒」，佢都用「多謝」嚟迴避結婚問題，其後出席活動時又自創金句「K象人狗論」再帶記者遊花園，呢啲咪叫高手囉！
落選港姐鄭寶源：「佢（鍾溥敏）可能係話林峯同佢自己好似，佢都係7號。（幫佢兜得好辛苦？）我都諗咗好耐。」
拆局：早排落選港姐鍾溥敏用粗口諧音話林峯，鄭寶源想幫佢講好說話，點知愈兜愈辛苦，認真用心良苦。
方力申：「每個人去到某個位有唔同處境，總之從此見證同埋學識以後乜嘢都話『秘密』。（有冇拍拖都會講大話？）不嬲都講緊大話。」
拆局：唔少藝人連環被踢爆婚訊，方力申都承認曾為護「愛苗」而講大話，但就避答係咪同鄧麗欣、鍾欣桐拍過拖。
林潔瑜：「剪咗短髮驚唔驚仲似許愿？唔驚！驚唔驚畀人話都唔重要，好早已經覺得唔重要。」
拆局：瑜瑜嘅EQ同IQ超高，就算畀人話佢似許愿，佢都話唔驚，就連正版許愿都話可能係佢私生女！
梁漢文：「美麗謊言好正常，我日日對老婆講大話，讚佢『靚咗』又『瘦咗』。」
拆局：梁漢文認為美麗謊言無傷大雅，既可「承認」講大話，又可當係讚美說話，不過唔知太太聽完會唔會扭耳仔呢？