全城矚目的「千億新抱」徐子淇早前為李家誠（Martin）誕下第二名千金李晞兒，李家一直以來對這兩個「金叵羅」都如珠如寶，子淇更悉心培育她們，看來下個目標是培養囡囡成為音樂家！前晚Martin與徐子淇出席君悅酒店《Hong Kong Talter32周年舞會》，代表老爺李兆基領取鑽石大獎。穿上大露背拖尾裙的子淇明顯已收身，但事前沒有得到老公批准：「佢都唔知，但我覺得唔算性感。」
湊兩個成功收身
其後，子淇風騷滿面大談湊女經，表示作為兩女之母，一腳踢湊女十分辛苦，她說：「其實追住佢哋都唔使做運動！好似做Gym咁，但佢哋都好好湊，兩個都唔鍾意抱，大女（晞彤）寧願落地行，細女（晞兒）就鍾意瞓喺床！佢哋都好健康。老公雖然都有幫手湊，但佢要返工。我鍾意自己湊多啲，唔想佢哋跟工人同助手咁多，反而Martin肥咗10磅，因為佢唔使點湊。」Martin則插嘴說：「我估佢同未生前嘅磅數差唔多！」
子淇曾在晞兒的「百日宴」講過，兩個囡囡均喜歡「黐」爹哋。雖然她表示現時囡囡都「黐」父母，但在旁的Martin即踢爆：「我同佢哋玩多啲！」子淇聞言即自爆在家中負責奸角：「其實我負責鬧嘅角色，Martin只係話兩句唔會鬧！」談及收身時，子淇表示今次能極速收身，皆因湊女辛苦，連Baby Fat也拜拜！
笑細女似鄭則士
問到大女晞彤現已返學是否很忙？子淇即點頭，並揚言正培養囡囡的音樂天分：「其實真係幾忙，要湊大女返學，細女四個幾月大，但已經幫佢報讀Music Class，唔使咁悶畀佢玩吓！聽人講話細個上呢啲課程，啲音會準啲，家姐都有學，佢哋條路都一樣。」
另外，子淇還透露晞兒雖然只得四個多月大，但已有17磅：「佢真係可以Share家姐啲衫着！個身好圓好肥，仲有肚腩仔！我之前望佢覺得佢似Martin，依家唔似喇，反而似一個人，終於畀我諗到佢似鄭則士！似佢都幾好，又肥又得意，佢依家仲識『咿咿呀呀』添！」談及陳慧琳曾表示一日不見囝囝即喊，子淇說：「我唔會喊，但會掛住。每年我哋都有Honey Moon，去3、4日都好，有自己時間！」她表示下年將會開工繼續「造人」。
胎教聽莫扎特：懷孕時子淇已經常彈琴及計數，又摸肚講故事及播莫扎特樂曲進行胎教，訓練胎兒腦部發展。
陪女去公園玩：子淇帶女兒往公園玩滑梯及沙池，接觸其他小朋友，更表示待女兒長大後帶她搭巴士，加強社交技巧。
學習多國語言：大女晞彤由半歲開始已返Playgroup，主要學英文、普通話、法文及日文，相信晞兒亦會一樣。
灌輸惜福道理：子淇經常對女兒灌輸行善意識，除了提女兒做人要知福，並將女兒的利是錢捐出行善，加強德育培訓。
包泳池學游水：晞彤每星期有三日到酒店泳池包場學游水，讓女兒鍛煉健康體魄。