女藝人臉上個妝梗係好重要啦！咁究竟邊個女藝人個妝濕完水都冇事呢？答案一定係江若琳（Elanne）！佢真係名副其實嘅「出水芙蓉」嚟㗎！
有日小小So約咗Elanne同梁嘉琪食飯，明明半個鐘頭前Elanne仲話自己喺屋企沖緊涼，但係話咁快已經蒲頭，仲話啱啱洗完頭……但Elanne化咗個全妝，唔似啱啱濕完水，小小So就問Elanne究竟佢洗頭前有冇落妝啦！點知就發現咗Elanne個妝原來係「無堅不摧」嘅。
小小So：你邊有可能半個鐘入面，洗頭又沖涼又化到個全妝呀？
Elanne：哈！我洗頭前都冇落妝。
小小So：你個妝唔甩㗎？
梁嘉琪：佢個妝係唔會甩㗎！有次我哋拍淋雨戲，成個劇組啲人都走晒樣，唯獨Elanne點淋都好似啱啱補完妝咁。
Elanne：係喎！我從來唔使補妝，亦都唔會滲面油。
小小So：你用邊隻粉底咁厲害？
Elanne：唔關事，係化妝師嘅手勢！佢搽粉嗰陣，將啲粉慢慢咁按落塊面度，好貼，簡直可以話係「人粉合一」呀！
「人粉合一」咁啜核嘅形容詞都畀你諗到，Elanne果然轉數快！