在澳門長大的余翠芝（Chita），為實踐歌手理想，98年隻身來港闖蕩，經歷了11個年頭的艱苦奮鬥後，Chita終得償所願推出個人大碟。談到多年來的難忘事，Chita笑言是初初來港時，以「漁翁撒網」式參加歌唱比賽，並成功吸引到當時黎瑞恩的經理人注意及賞識：「佢問我有冇興趣同幕後音樂人合作，就係因為咁，我同嗰個人一直孖住上，期間有人問我有冇興趣個人發展，但最後因我唔想揼低個Partner而拒絕咗。」
因放棄是次良機，Chita坦言往後的日子並不如意，更曾試過返澳門轉行，幸她最終仍決定咬緊牙關：「05年我幫Twins作咗隻《十八變》，當時佢哋肯用我嘅歌，真係開心到唔識形容。」現已投身bma的Chita笑言，很感激周麗淇等師姐願意選用她的作品。