謝婷婷與男友安志杰前晚十指緊扣出席《第五屆善學善行耀中華慈善晚宴》，婷婷母親狄波拉及鬍鬚Kong亦有到場。安志杰不時情深款款望着婷婷，而婷婷提起男友時，亦對男友有讚冇彈，流露一副幸福表情，兩人分開接受訪問後，安志杰更情不自禁向婷婷索吻。

拉姑狂讚

提到與安志杰的相處，婷婷甜笑說：「好多朋友見到我哋拖住、攬住，都會問我哋係咪好耐冇見，其實我冇見一日、半日都會好掛住大家。（熱戀期？）佢係我香港Best Friend，佢好就我。（佢成日望住你？）我都唔知點解，如果一間房入面，有好多人，我都覺得佢最突出。（佢過咗狄波拉嗰關未？）一早過咗，今日佢個造型係媽咪幫佢打扮，媽咪一見到佢就搣佢塊面嚟錫，仲話佢好純、唔識講嘢、好怕醜，不過佢可以照顧我。」提到有傳阿嫂張栢芝再度懷孕，婷婷表示不知情，並指很久沒有見面：「真係唔知，我都好耐冇見佢，亦冇見過哥哥（謝霆鋒）。（致電栢芝？）冇！佢多數係同媽咪通電話。」