日前張家輝在果欄拍攝毆鬥戲，劇情講述身上綁了鐵板的家輝，衝入果欄尋仇，雖然道具組已為他預備一塊膠板頂替，但拍攝現場又熱又焗，雖然家輝拍到大汗疊細汗，但停機後仍不肯除板休息：「停機可以除低塊板抖吓，但我覺得焗焗哋好舒服！我發覺近年開始有少少變態，拍戲唔辛苦，反而冇Feel。（點慰勞自己？）我想去日本旅行，但係心大心細，跟住要開《証人》原班人馬嘅新片同埋一齣喜劇，我怕去完旅行之後，萬一患豬流感要留喺屋企隔離，咁咪失晒預算囉？」

家輝（右）在果欄拍打鬥場面，熱到身水身汗。

智叔指家輝攞影帝後，自我要求比之前更高，根本搶不到家輝鏡。

曾與家輝合作《証人》的智叔，也指家輝的自我要求提高了：「《証人》之後，家輝攞完影帝，睇得出佢對自己要求高咗，我就都係一貫咁啦！攞獎前後心態都冇乜分別，搶唔到家輝鏡o架！淨係睇吓佢副盔甲就知啦！」

莫小奇常NG灰心

而莫小奇則笑言影帝家輝肯教人：「我廣東話唔好，成日NG，個個都笑我，係得家輝會鼓勵我，佢話：『張靜初都係講成咁』，令我有番信心，起碼敢去講！」而在戲中被韋家雄輕薄的孟瑤則說：「唔尷尬，拍果欄戲都唔算好熱，我試過喺內地拍劇，40度咪當減肥，減咗十磅呢！但距離我目標仲差五磅。」