張衞健（Dicky）同許志安識於微時，早排安仔生日約埋成班Friend食飯唱K，不過就搵唔到Dicky，唔知兩兄弟搞乜鬼呢？咁啱有日小小So見到Dicky，即刻捉住佢問清楚。
小小So：點解唔去安仔生日Party呀？安仔話打鑼都搵唔到你？
Dicky：（扮正經）呢啲煙花之地，我係唔會去嘅，酒不沾唇。
小小So：係咪老婆唔畀？
Dicky：（大大聲）畀！我咁有型咁Man，點會受制於老婆呢？只不過自己唔鍾意去呢啲地方，我又唔飲酒又唔猜枚，又唔鍾意唱卡拉OK，去嚟做乜？
小小So：安仔生日喎？
Dicky：日日都可以係生日啦！只要我個人喺香港，實有機會見到佢，得閒幾時出嚟食飯傾偈都得啦！
小小So：你哋係兄弟嘛！生日點可以冇你？
Dicky：（騎騎笑）佢都有人（女友）陪啦！唔使我嘞！
小小So：出年係咪同安仔、梁漢文同蘇永康四兄弟喺紅館開騷？
Dicky：係咪？我哋四個係藍籌，屬於長線投資，到時記得嚟支持呀！