亞姐港澳賽區候選佳麗昨日在酒店學習餐桌禮儀及護膚心得，不過擁有豐滿身材的「o靚版關之琳」(7)仝曉燕再度「失蹤」，前後已共十日，亞視高層葉家寶指她早前因證件問題返回內地，但自此無影無蹤：「佢電話轉駁去留言，提名人話佢提過想讀書，家人又唔想佢參選，佢冇正式向亞視提出申請，依家我哋最後通牒，星期四前仲未回覆就取消資格，亦保留追究權利！」

傳惡老師唔畀請假

仝曉燕昨日未有接聽電話，但其在港的朋友余少寶透露其退選原因：「聽佢講上次返上海演藝學院請假，有個好惡嘅女老師講明如果佢請假就唔畀佢畢業，之前讀嘅都白費，所以佢決定讀書唔選美。」她坦言曾勸仝曉燕將來再讀書，但對方很堅持。

葉家寶指佳麗與亞視簽下參選合約，除非身體或精神有問題，才可申請退選，但不可無故退出，至於會否要求賠償？葉家寶表示亞姐製作費達千萬元，很難向她追討，但有培訓課程及其他造型花費，都要開會研究。他又指若仝曉燕真的退選，亦不會有後補佳麗。

林紫君唔覺贏面增

由於仝曉燕是賽前大熱，其他佳麗眼見少了一位勁敵，昨日分外風騷，當中林志玲師妹「翻版李嘉欣」(2)王希瑤迅即成為頂頭熱門。至於(5)林紫君坦言未聽聞仝曉燕退選：「平時佢講普通話，所以大家好少溝通。（勝出機會大咗？）唔覺！只覺得少咗個成員，冇咗團隊感覺。」至於(8)戴瑞姍於澳門拍攝外景時與仝曉燕同房，她坦言不知對方失蹤：「冇聽過佢唔想參選，見佢冇乜異樣，少咗一個成員好可惜。」

林紫君表示未有聽聞仝曉燕退選亞姐。

王希瑤頓成大熱，全程笑不攏嘴。