做藝人出出入入都有保母傍實，但傍實還傍實，有啲藝人就誤當保母係阿四亂咁點人做嘢，真係一樣米養百樣人！不過凡事都有例外，無綫小花陳敏之（Sharon）就係其中一個例外。話說有一日Sharon去影專訪，小小So去探班，大家喺門口撞到正，見Sharon一袋二袋，又手袋又Shopping Bag，仲以為佢啱啱Shopping完，佢保母就話：「佢影專訪，特登準備咗幾套衫！」咁小小So就奇怪咁問：
小小So：袋嘢咁重，點解唔畀保母幫你拎？
Sharon：都唔係好重啫！我自己借，自己還，自己拎。
小小So：咁你個手袋咁大又裝啲乜？
Sharon二話不說，坐低攤開個袋畀小小So睇。
Sharon：我平日返工會帶好多嘢，有化妝袋、零食、記事簿、銀包、電話、頸巾等，最重係個化妝袋，拎少一樣都唔得㗎！
小小So仲發現Sharon用保鮮密實袋將隨身物分類。
Sharon：我有少少潔癖，覺得用保鮮袋分類，會乾淨啲，而且方便我搵。
Sharon唔單止自己嘅事自己做，佢見保母最近榮升爹哋，仲特登去買啲BB衫送畀保母，咁有心，認真唔話得！