重拍七十年代李小龍主演、美國著名劇集《青蜂俠》的同名電影，上周正式在美國洛杉磯開拍，接替周星馳飾演加藤一角的周杰倫（Jay），前日正式埋位與荷里活女星金美倫戴雅絲大演對手戲，雖然Jay當日沒有着上戰衣，只以打呔斯文Look現身，但卻上演一場英雄救美的戲份！

Jay首日開工被狗仔隊拍到與在片中飾演青蜂俠秘書Lenore的金美倫在草地上閒逛，二人互搭膊頭嬉戲期間，身穿高踭鞋的金美倫差點跌落石壆，幸得Jay及時扶實。而另一場就是擔任Jay替身的特技人駕着青蜂俠戰車撞牆的場面。

網友轟不及李小龍

早前電影公司宣布由Jay擔演加藤之後，惹來網友狂踩，其造型曝光後網友亦未改觀，仍然繼續炮轟：「Jay點可以進軍荷里活？佢係歌手唔係演員，佢識英文咩？定還是個角色唔需要講英文？加藤只有一個，就係李小龍！呢個簡直係笑話！」不過亦有網友留言撐Jay後生又得意，笑起來充滿陽光味道。除了外國網友幾乎一面倒反Jay外，連內地網友亦批評他的演技不及李小龍！

而拍攝Jay的戲份前，金美倫與飾演青蜂俠的諧星Seth Rogen亦拍攝了另一場戲，她攞着一把中國味道極濃的雨傘遮蔭，與報業出版人身份的Seth一同舉行記者會接受電視台訪問，期間Seth更被伏擊，左膊受傷。