洪卓立、詩雅及陳家樂昨日到戲院充當臨時售賣員，向購買英皇電影《很想和你在一起》戲票的觀眾派爆谷，有影迷自備心形紙盒索爆谷，又大叫偶像名字打氣，場面墟冚。

詩雅日前低調赴北京為美國霍士電影投資、夏永康執導的新片《熱辣辣》開工，與素顏演出的Angelababy「鬥戲」，她笑說：「佢Sell素顏，我Sell濃妝，事關我個角色係做模特兒嘅。同內地演員段奕宏有好多對手戲，對方出名好戲，我壓力好大，加上自己啲普通話講到一舊舊，『流血』講到變『留學』，佢哋話要再搵人配音喎！」但她自言此行獲益不少。

「劊子手」邀合照

現場所見，詩雅裝爆谷時雞手鴨腳，散滿枱面被取笑，原來洪卓立入行前亦「不相伯仲」，曾於影音店擔任售貨員的他，上班不夠六日即被辭退，他尷尬地解釋：「我記唔到啲影音專業名詞，高層好有禮貌咁同我講，覺得我唔適合做呢行囉！最好笑係前兩年同容祖兒去番嗰間公司嘅春茗做嘉賓，炒我嗰個人特登走嚟同我合照呀！」而陳家樂亦曾擔任餐廳收銀員，不料因有「優待」而遭男同事排斥，惟有自行辭職。