經常要回應緋聞及面對傳媒逼供的黎明,啜核金句層出不窮,每次均令人笑破肚皮。
Gaile生BB?
記者追問黎明會否生BB,是否與女友樂基兒早有默契?
金句:「原則會取締默契,默契會產生更多議題。」
分析:雖然黎明呢句說話聽落去好似好有道理咁,但弊在除咗佢自己同樂基兒之外,真係冇乜人明佢講乜,唔通呢啲就係真正嘅默契?
妙論舒淇
09年2月,黎明與舊愛舒淇同場,記者問黎明會否大方與舒淇打招呼。
金句:「如果見面唔打招呼係我嘅問題,我係正常人,唔會發生喺我身上。(再見亦是朋友?)呢個迷津答你唔到。」
分析:黎明呢句說話夠晒教育意味,相信以後一定冇人夠膽唔同黎明打招呼,因為會被列為「唔係正常人」嘅行列。
命運之櫈
黎明擔任光良音樂會嘉賓時發現坐爛櫈,光良即時要求與他換櫈。
金句:「唔使,命運安排屬於邊個就邊個。」
分析:一張爛櫈就成功令到黎明相信命運,絕!
幾時食早餐?
有日黎明突然胃痛,並揣測胃痛原因。
金句:「我估係因為我空肚食早餐。」
分析:食早餐就梗係空肚啦!黎明咁樣揣測自己胃痛嘅原因,證明佢真係夠晒幽默。