江若琳出道便以少男殺手姿態示人，長髮斯文形象，堪稱典型的乖乖女，但私底下的她個性從來都不是女性化，江若琳自爆從小已是男仔頭，有段時間很多人都以為她真的是男孩子，江若琳說：「我細個一直都係短頭髮，從來唔着裙，我懷疑媽媽都係當我男仔養，去到日日幫襯嘅茶餐廳，人哋都係同我講『細佬，食乜嘢』，我自己好習慣，冇介意過喎！亦都唔羨慕人哋嘅小公主打扮，直到有一次媽媽做咗條裙畀我，帶我返教會，真係嚇親大家。」

男仔頭個性

江若琳坦言除外表外，小時候的她個性也似足男仔頭，經常不停跳很頑皮，她說：「話唔定我係有過度活躍症，就係因為咁，我成身都受過傷，試過有次攞住支原子筆跌低，結果拮親塊面，到依家塊面都有個藍色窿仔。」

調皮的她更有多次出入急症室的經驗，沖涼跌親、撞穿頭這些家居意外不時發生，連醫院的醫生都認得這位調皮的小妹妹。