瑞士名錶DOXA前晚舉行百二周年紀念晚會，大會宣布委任方中信成為品牌亞洲代言人，並由他展示全球限量發行的手錶系列，期間他大賣口乖表示深感光榮，自言性格與品牌標語一樣，每時每刻享盡精彩。事後，他透露今次以七位數酬勞任代言人，而品牌又給他名錶任揀的機會，結果他一口氣選了數隻價值五位數的名錶：「我向來都喜歡收藏，有咗個女就好耐冇買，今次有錶送，可以慳番啲錢，唔使買玩具畀自己，可以留番啲錢買玩具畀個女！」

寇鴻萍及老公盛裝赴會。

陳山聰（左起）、蕭正楠、黎諾懿及袁偉豪齊齊穿上緊身衫褲扮溫拿樂隊。

陳山聰唔怕動L

此外，大會安排黎諾懿、陳山聰、袁偉豪及蕭正楠扮溫拿樂隊獻唱懷舊歌曲，四人齊以現「袋」褲造型示人，他們穿緊身褲上陣未感尷尬，亦不擔心會發生「動L」事件。陳山聰更取笑黎諾懿的PatPat最挺：「我哋戴咗假髮之後，感覺好似癲佬。黎諾懿係咪嘴王，唱歌嘅時候淨係得我同蕭正楠唱！」

對於關淑怡被指廿多年前已婚，同場的張學潤說：「同佢做咁耐朋友都未聽過咁嘅嘢。（恭喜佢？）好出奇，尊重佢嘅私隱！（個仔係呢個男人？）唔知！（似曾志偉？）一啲都唔似。」