最近小小So同朋友去High Tea，咁啱撞見麥浚龍（Juno）同林夕，於是大家坐低吹吓水，林夕話依家為咗Juno填詞嘅新歌《弱水三千》忙到氣咳，因為要不停宣傳。外表Cool爆、總係令人覺得佢係世外高人嘅林夕，同小小So喺個幾鐘頭嘅對話中，令人有刮目相看嘅感覺，原來好似好古肅嘅林夕，竟然比Juno仲健談，原來人真係不可以貌相！
記得嗰日，林夕同Juno話《弱水三千》連前「兩部曲」《生死疲勞》、《癲倒夢想》，歌詞、意境同生、死有關。小小So就隨口問林夕同Juno：「其實有冇諗過幫自己構思自己嘅葬禮？」點知Juno諗極都諗唔到，諗咗幾分鐘終於忍唔住問：「點解問埋呢啲嘢嘅？」反而林夕大讚問題有趣，佢話：「個問題幾好呀？我有諗過o架！」
林夕話已諗定搵邊幾位好朋友幫佢扶靈，到時佢死咗就點點點，但因為佢覺得自己未死得住，所以詳情未有，仲未可以同小小So詳細交代，雖然內容欠奉，但誠意可嘉。反而曾經因為緋聞而經常做「C1頭條常客」嘅Juno，始終唔知點答，見到佢都戥佢辛苦，相信Juno經過今次之後，除咗要向林夕學習音樂造詣外，仲要學林夕點樣天馬行空、乜都識答啦！