楊：楊千嬅 記：記者
記：今日好太太Look喎！習唔習慣人哋叫你丁太？
楊：一聽到人叫丁太就身痕，不過都開心，好似同我講恭喜發財咁。好多同事問我嚟緊派利是同補派餅卡，不過下年先啦！都未過大禮，我仲係楊小姐。
記：幾時擺酒過大禮？
楊：出年先，起碼要做埋今年啲嘢先，其實之前都冇諗過結婚咁快畀人知。今日佢（丁子高）有另一個Event，佢都好緊張。（肉緊幫老公講說話）我哋Artist見慣記者都會緊張啦！而且佢平時講嘢又勁窒。
記：有冇喺屋企同佢排定點講？
楊：唔使！最真心同直接講係最好嘅。
記：幾時同丁生一齊出嚟？
楊：等正式結婚嗰日先，你估做騷咩？平時已經成日做啦！如果出街畀人影到就話冇計啫！（會唔會夫妻檔？）又冇諗過喎！夫妻檔可以做啲乜？
記：拍廣告可以收貴啲。
楊：（搞爛Gag）唔係平貴嘅問題，唔通拍女性用品廣告又叫埋佢咩？
生兒育女未講得
記：丁生話叫你做BB喎！
楊：（隨即冧笑）佢講咩就咩啦！平時去人哋屋企，佢見到人哋個仔可愛，又 會叫BB，見到人哋隻狗可愛，又會叫BB。
記：咁你可唔可愛？
楊：都幾可愛嘅！哎呀！好骨痹，好得人驚！
記：你平時點稱呼丁生？
楊：今日講太多喇！今日叫番我千嬅啦！
記：丁生話希望你40歲前生BB。
楊：今日唔講得住，我同公司有協議……生BB啲嘢等個天畀啦，自己決定唔到。哎呀！我愈講愈身痕，搞到胳肋底都濕埋，所以要着件深色嘅衫出嚟。
每逢提起丁子高即笑不攏嘴的千嬅，對於與老公的拉斯維加斯結婚之旅至今仍相當難忘：「我成日同啲Friend推介嗰度，嗰度係兩個人嘅世界。」不過當談到婚訊遭外國網址「洩密」時，千嬅即感觸起來：「我啲Friend係咁問我個網址係乜，話想Check吓仲有冇其他人結咗婚，我奉勸大家戶口往來唔好喺網上做，去總行做好啲！」
祝華仔婚姻美滿
至於關淑怡被揭入行前已結婚，千嬅竟稱曾擔心是自己連累對方：「似骨牌效應，但諗深一層又唔關自己事，源頭應該係劉德華！如果要計連累嘅話，下一個應該係黎生，所以我唔敢打畀佢。（對關淑怡結咗婚好愕然？）冇乜所謂，每個人都有自己嘅選擇，最緊要佢開心。」問到劉德華為秘密結婚公開道歉，又認曾與喻可欣簽婚書，千嬅不欲多談：「私人嘢唔方便評論，作為朋友，我祝佢哋開心，希望華仔同太太有美滿婚姻，快啲生個肥肥白白嘅BB。」
此外，千嬅完成錄影工作後，即前往銅鑼灣與友人打邊爐，至於丁子高則前往跑馬地馬會消遣，看來結婚後的兩人，依然各自各精彩。