丁：丁子高 記：記者
記：點解咁即興結婚？
丁：我生日之後同千嬅去咗美國洛杉磯，同佢去環球片場玩時，千嬅整親條頸，佢個人（處理）細嘢好大頭蝦，我就話不如畀我照顧你，於是我哋去賭城，其實所有事發生得好突然！我本身諗住註完冊先同屋企人交代，咁當然父母知道，但仲要同其他人交代。今年工作上有大改變，有啲工作要Confirm，千嬅下半年都有好多工作，我哋諗住傾好先同傳媒講，總之嚟得好突然！
記：對千嬅有乜承諾？
丁：照顧佢一生一世！我唔會好似啲老夫老妻咁，結得耐就感情變淡，大家會Keep住每日都咁開心，同佢好似朋友形式咁。（鍾意佢啲乜？）佢係一個非常可愛嘅女仔（冧笑），喺屋企望住佢，佢啲小動作好可愛，尤其佢專心做某啲嘢時個樣好好笑，但我當然唔會講係乜嘢。
記：依家仲分開住，會唔會好掛住對方？
丁：有時間大家會見面，而且會傾吓電話，大家放假會食飯。（買屋一齊住？）我都未同屋企人傾好，遲啲先，希望過二人世界。（搬去赤柱家一齊住？）呢個可能性好低。
記：幾時擺酒？
丁：會，但未定，四日（畀人踢爆咗）之嘛！我喺洛杉磯有同佢父母講，佢哋好開心。（父母愕然？ ）二月千嬅生日時，我已經同佢求過婚，佢應承過話好，但未話過係幾時。
想生一仔一女
記：千嬅拍肚話自己冇BB？
丁：佢似有咗咩？我仲似有咗啦！（計劃幾時有？）好遠嘅事。（都要考慮吓千嬅嘅年紀？）佢冇問題！其實我哋一齊後都早起早睡，我連煙都戒埋！（四十歲前生BB？）呢個係天意，但我會計劃。（現在不設防？）到時先算。（生幾多個？）想生兩個，一仔一女。
記：努力搵錢養妻？
丁：係，所以諗住自組公司。（千嬅係富婆有壓力？）年幾前自己已經有計劃，我父母都話係時候叫我搞（公司），可能香港、上海兩邊走。（千嬅財政上支持你？）爹哋支持我就夠。（畀家用千嬅？）我會畀家用媽咪，遲啲先（畀千嬅）。
記：依家係咪叫千嬅做老婆？
丁：……（面露尷尬笑容，沒有回答）
記：你係咪叫千嬅做BB？
丁：咁叫最好。（互相都叫BB？）咁叫最好。（安排一個世紀婚禮？）到時先，一定自己公司搞番。（怕畀人話男卑女尊？）我唔怕，咁多年，我好多嘢都冇解釋，好多傳媒不斷攻擊我都冇解釋，對我有好多偏見！我答咗又要問千嬅，令佢好大壓力，所以一路我唔出聲，對自己工作有信心。
否認為分身家
記：你父母鍾唔鍾意千嬅？
丁：好鍾意，一早好鍾意。（屋企有冇家規？）媽咪好Modern，冇乜家規。
記：有報道話你同千嬅結婚可以分身家？
丁：佢分我身家好啲，我唔會分佢身家。（有冇寫婚前協議書？）我會買份保險，畀晒所有嘢佢，佢唔使畀我。其實呢啲嘢（傳聞）每兩個月就有，我哋去過愛都大廈一次，佢哋就話我搬咗入去住，話係我愛巢，又話我人工兩萬蚊！問心，有冇可能兩萬蚊請到我？成日話千嬅買車畀我，架車其實係我由細揸到大，係比較平嘅車，唔通十幾年前千嬅識得我就送畀我？嘥氣！唔解釋！由得佢哋寫飽。（你哋財政獨立？）應該係咁，我唔會干涉佢嘅工作。
活動上，不少名人紅星如陳小韻、陳豪與Lisa S.等也上前恭賀他新婚之喜，他全程滿面笑容，完畢後，丁子高揸車到跑馬地會所。