收埋朱麗倩接近四分一個世紀的劉德華（華仔），半年前接受訪問時還理直氣壯揚言結婚會公告天下，言猶在耳，最近被揭發與朱麗倩於去年在拉斯維加斯結婚！喻可欣母再爆愛女跟華仔在1985年12月31日在她見證下曾簽婚書，誠信成疑的華仔最近更被網友封為「大話天王」！為免多年建立的形象就此破滅，華仔昨日從北京返港時一臉懺悔，向粉絲說出情深的道歉！
粉絲人牆護駕
昨日在北京機場時，已有一大班粉絲護送華仔到機場，與此同時，近百名華仔粉絲組團到機場為偶像開路！為免場面混亂，現場除有8名保安維持秩序外，華仔唱片公司更派出兩名高層到場指揮。下午4時，身穿T恤牛仔褲的華仔在兩名助手陪同下抵達閘口時雙手合十，粉絲見華仔準備出閘，即築起人肉圍牆阻礙傳媒採訪，加上在場逾半百記者採訪，場面混亂，連見慣大場面的華仔都被擠迫得面容扭曲！不過當記者要求做訪問時，他一口答應，表示可在前方做訪問，不過粉絲仍把人牆築得密不透風，他即用眼神「厲」着粉絲，人鏈即解散，然後往通道口接受訪問。
華：劉德華 記：記者
記：咁混亂係咪好擔心？
華：（愁眉深鎖）係，好擔心大家！
記：係咪瞓得唔好，好大壓力？
華：都OK！（開始有點眼濕濕）首先我係公眾人物，我對自己講大話嘅行為令好多人失望，所以我要公開同相信我嘅人道歉，希望可以原諒我，我可以講嘅係我已經結咗婚！
記：傳聞你有個女？
華：我冇細路仔，男女都冇，以前到依家都冇，全部都係我家人、親戚、同埋朋友個朋友嘅細路，佢哋仲細個，畀佢哋過平靜生活！
記：個女仔喺馬國（外父喪禮）同香港都影過，仲同過劉爸爸飲茶喎？
華：唔係同一個！
記：咁同劉爸爸飲茶嗰個呢？
華：係家姐個孫女！
記：你想生小朋友？
華：我心裏嘅嘢唔想講。
記：係唔係想人工受孕？
華：呢件事想放喺心裏，唔想講出嚟！
記：成功受孕會同大家分享？
華：唔想同大家講，到時先算！
記：譚詠麟話過你兩招（生仔）！
華：多謝！多謝！多謝！
擔心太太受壓
記：鬆一口氣？
華：梗係，一路放喺心裏秘密咁耐，唔……（說話有點遲疑）點講呢？
記：係唔係如釋重負？
華：唔係呢樣，唔知點講！
記：太太係唔係鬆一口氣？
華：唔好再討論咁多！
記：太太係唔係有壓力，所以唔敢出街？
華：當然會希望佢好！
記：最擔心係咪佢？
華：所有人都擔心，不過最擔心係屋企人同佢！
記：唔想講係唔係因為要保護家人？
華：唔想大家有揣測，睇到我嘅網絡，要講嘅已經講晒，唔想再講，我自己做錯係應該，其他人就唔應該！
「做好啲」洗惡名
記：對畀人封做「大話天王」，係唔係唔開心？
華：係唔開心，嚟緊嘅日子會做好啲！
記：帶太太出席粉絲聚會？
華：冇諗過！未知！
記：喻可欣近日成日出嚟講嘢，覺得佢係咪想出風頭？
華：（神情嚴肅）唔好再講其他人，我衷心衷
心同相信我嘅人講對唔住、對唔住！
記：喻媽媽話你當年同喻可欣簽過婚書？
華：係有！
記：會唔會怕佢攞出嚟？
華：冇所謂（苦笑）。
記：會唔會後悔對喻可欣曾許下承諾？
華：我唔想講！（此時華仔被助手拉走，對於記者提問沒有再回答！）
返回座駕時，沿途有不少粉絲大嗌：「華仔，我支持你！」華仔亦把粉絲信、花及禮物一一收下，有粉絲大叫大嚷，華仔即做起「殊」的手勢，着令大家靜一點，問到黎明及楊千嬅已婚一事，華仔亦沒有回答，雙手合十，然後上車返回加多利山寓所。