跳舞又叻又靚仔嘅陳偉霆（William），梗係成為唔少少女心目中嘅理想男朋友啦！就連忙到不得了嘅o靚界女神Angelababy都鍾意同佢撐枱腳。之前小小So都好疑惑，點解William咁叻仔，可以連o靚界女神都冧到呢？後尾謎底終於解開，就係靠把口喇！
話說有日小小So見到William同同公司嘅詩雅同埋其他朋友一齊傾閒偈，正當詩雅興高采烈咁話鍾意啲會為佢開車門嘅男仔時，William竟然猛咁喺隔籬偷笑，由於詩雅一邊講、William一邊笑，詩雅最後都忍唔住問咗William一句：「你笑乜啫？」William隨即笑笑口咁解釋：「我喺度諗，咁你咪好鍾意酒店門口幫人開車門嗰啲人囉！」
雖然William個笑話鬼死咁爛，但難得現場啲女仔個個都畀佢氹到好開心，個個一邊噓一邊狂笑。之後仲有人同小小So爆料話：「William真係好口多o架！成日窒啲女仔，搞到人哋鬼死咁尷尬，但唔知點解，個個都嬲佢唔落o架喎！」所以幾時都話，男人要做萬人迷嘅話，把口同佢個樣都同樣重要o架！