祖兒將於下月四日舉行《JOEY YUNG PERFECT 10 LIVE 2009》日夜兩場，記者會播放她過去十年的工作短片，經理人霍汶希（Mani）送上巨型鑽石形音樂盒，寓意祖兒有永恒的成就，繼續發光發亮，Mani更爆響口：「擺喺你新屋！」至於英皇高層吳雨亦鼓勵祖兒：「人生冇幾個十年，珍惜呢刻！」

祖兒接受訪問時透露，為了配合十周年音樂會，屆時會選出十年來的「金中金」歌曲：「十年過得好快，開頭啲人覺得我『蒸生瓜』，依家就了解咗，覺得呢個女仔平時講嘢甩甩漏漏，但做嘢都好畀心機！」不過，祖兒否認搬新屋：「遲啲先，間屋夠住，做得咁辛苦都係為食同瞓！（咁簡單？）係，我係豬！」

問到這十年沒有伴侶是否最遺憾？祖兒想了想才說：「十年心願已經達成，下一個十年都未輪到佢（伴侶），嚟緊十年希望喺遠啲地方可以成功，不過聽日發生咩事都唔知，好難講！（恨唔恨？）好渴望愛情，但唔強求！」對於有傳楊千嬅結婚為換獎？她力撐千嬅說：「咁好想像力，點會咁兒戲！（你本來六連霸？）失而復得反而仲開心，等我！」

霍汶希（右）送上鑽石形音樂盒，寓意祖兒繼續發光發亮。

吳雨（右起）、祖兒和霍汶希等在記者會上開香檳慶祝。

被阿嬌感動到眼濕濕

此外，祖兒昨日接受《巴巴閉邊個夠我查篤撐》電話訪問，她甫接電話便說：「好慘呀，冇得傳婚訊！」但她亦戥千嬅高興：「有一個女歌手成功嫁得出令人好開心，企喺前線女歌手難嫁啲㗎！」主持指「天后」之中只有她未嫁，祖兒自嘲：「我係籮底橙呀！不過我又唔急於結婚，都未過三字頭，仲有一年時間畀我去牙擦！」而她透露前晚往欣賞阿嬌的舞台劇《星爸阿爸》，更大讚阿嬌演得出色：「見到阿嬌從個深淵爬番上嚟，睇到佢嘅決心同勇氣，我都感動到眼濕濕！」