王秀琳昨日穿上圓領T恤出席遊戲機活動，問到會否邀男性到其家中打機？她說：「唔會，個個男仔都應該有一部。（城城呢？）唔知呀！（冇上過去打機？）唔知呀！（知唔知城城同熊黛林拍拖？）都唔知！（做第三者？）朋友啫！係記者寫到有咩關係咁，『偷杧』呢個字眼好核突。（發展機會？）朋友可以Keep落去，絕對冇諗過做女友，出街好正常，根本唔使避忌。」她更大方表示不怕與熊黛林同場及合照。

另一邊廂，城城昨晨以聯合國兒童基金會大使身份，出發到泰北湄洪頌進行探訪，Mango對此瞭如指掌：「我知呀！（佢話你知？）我哋有聯絡，係朋友關係，大家做呢行，有咩唔識都會問佢。」她又解釋當日被撞破後跳車，全因沒有打扮：「係自然反應，我都唔好意思，大家做朋友搞到咁。（怕唔怕影響城城？）冇話怕唔怕，朋友冇計咁多。」她又否認為推出新碟而製造新聞，而自爆有豬流感（H1N1甲型流感）病徵的她竟沒有戴口罩。

結婚唔會玩即興

至於城城（Aaron）現身機場時，心情大好的他與日前黑面判若兩人：「做善事特別開心，未來除咗工作，仲有啲公益上嘅計劃。（結婚計劃？）暫時未係結婚狀態。（即興？）煮飯咩？我份人咁直，結婚一定講。」對於另外三位天王已成家立室，城城送上祝福，又笑言暫與工作結婚，提到助養小朋友，他說：「性格問題，覺得除咗錢，仲要成日陪佢哋，暫時未有呢個能力。」

近日網上有不少人討論「杧城」緋聞，大多數均較支持熊黛林，認為她較高貴，網友「cookiesss」更說：「加埋紀香可以打麻雀添！」