黎耀祥嘅囝囝黎正橋最近做咗佢嘅私人攝影師，因為每次出席活動，正橋都會攞埋部私伙相機幫爸爸影低活動嘅盛況，祥仔仲話囝囝影完啲相，可以畀佢放上Blog，真係好方便。有次小小So去探祥仔班，甫到場已經見到正橋拎住部相機左影右影，見佢咁落力，小小So都唔敢騷擾佢，於是自己坐埋一邊。不過5分鐘唔夠，小小So就見到正橋停晒手兼扁晒嘴！
小小So：做乜唔開心？
正橋 ：（長嘆一聲）唉……
小小So：有乜可以幫到你？
正橋 ：我個相機冇晒電呀！連機都開唔到！
小小So：你冇第二舊電咩？
正橋 ：我問咗媽咪喇！我唔記得帶另外一舊電出嚟！你有冇電可以借畀我？
小小So：我同你部相機型號唔同喎……
呢個時候，放Break嘅祥仔，聽到囝囝因為相機冇電而唔開心，就即刻氹番寶貝仔話：「唔使緊張啦！影唔到就算，至多一陣放飯同你去買個叉電器喇！」嘩！祥仔咁錫正橋，怪唔之得正橋肯成日跟住爹哋，去到邊影到邊啦！