拍拖逾兩年的楊千嬅與丁子高（Real）終開花結果，被踢爆於本月11日於賭城結婚。榮升丁太的千嬅昨日首度公開露面，出席《太陽計劃2009》活動。雖剛剛新婚，但她未有戴上婚戒，只掛上「RM」頸鏈，原來該鏈是老公紀念拍拖兩周年所送贈，認真甜蜜。千嬅還發放兩張結婚照，其中一張Real替她戴上婚戒，另一張則是合照，千嬅眼泛淚光。

記：記者　楊：楊千嬅

記：慣唔慣做丁太？

楊：老實講唔係好慣，叫楊小姐親切啲！其實件事好開心，唔該晒華仔（劉德華）幫我引領。呢個婚禮係好Surprise（驚喜），咁樣公布就更加Surprise！諗住出年先結，完成合約同廣告先。之前我哋約埋一齊旅行放假，去到即興結婚，事後只通知父母同老闆。（千嬅表示因有合約及廣告在身，要先履行責任。如今被踢爆婚事，她為事件感抱歉。）

否認奉子成婚

記：求婚過程感動？

楊：今年我生日去咗韓國玩，佢搞咗個驚喜派對，仲跪低向我求婚。當時好感動，點知佢喊得犀利過我，嗰刻開始諗結婚，但唔係諗今年。直到佢七月生日，諗住去旅行。之前做過訪問話『如果上天畀我60歲人生，過咗30歲之後係覺得要倒數。』我冇諗過佢記住呢句話！當我哋去到L.A.時，佢話如果真係30歲過咗要倒數嘅話，係咪應該好珍惜：『畀我陪你一齊行埋落去！』我聽到好感動！（千嬅眼紅紅）即刻揸車去登記註冊，唔係有心瞞大家，至今結婚證書都未收到。

記：明年擺酒？

楊：雙方家長見咗面，明年會擺酒，父母都係兩、三個星期前先知，好多親友未通知晒。

記：奉子成婚？

楊：睇個樣就知唔係！呢件事好急，戒指都係臨時買，搞到唔啱戴，我嗰隻就鬆，佢嗰隻戴到一半，仲要戴錯手！證婚人係猶太人，講英文唔太正，我忍唔住笑。

記：連串爆出婚訊，影響外界對藝人嘅誠信？

楊：香港好多人結婚冇講出嚟！唔係有心唔講，只係未適合。同老闆有協議，唔想市場影響對我嘅信心，絕對唔係退出娛樂圈。（牴觸合約？）咁又冇講明唔畀。

讚老公心地好

記：擺酒通知大家？

楊：會！不嬲唔呃大家。（求婚幾次？）兩次，一次我生日，一次佢生日，我生日嗰次喪喊。

記：黎明都被踢爆？

楊：搞掂自己先啦！咁梗係恭喜佢。（陳奕迅叫唔好畀帖？）佢客氣，我會Email畀佢。

記：註冊後分開住冇洞房？

楊：依家呢個時代冇乜所謂，嚟緊下半世成日見，依家要珍惜一個人時間。（千嬅指在雙方父母心中兩人仍未正式結婚，要擇日過大禮，但楊母開心女兒嫁得出。）

記：鍾意佢啲乜？

楊：佢對我同家人好好，心地又好，拍拖後大家改變咗好多生活上嘅嘢同諗法，佢都變得成熟咗，唔係出面咁諗佢。佢有幽默感，我有時工作辛苦，佢會畀正能量安慰我，佢有畀我結婚感覺，從前未試過。

記：鄭中基恭喜你？

楊：多謝佢，希望佢都快啲，大個仔呀！應該成家立室！

　　活動後，千嬅往灣仔與公司工作人員商量發放結婚照事宜，離開後返赤柱寓所。丁子高則透過SMS回覆本報：「我星期二喺Event先講，多謝關心。」