之前被指爆房嘅尹蓁晞（Yumi），有啲咁嘅報道出街，實畀人覺得佢係「Wet妹」啦！其實Yumi份人好鬼單純，平時唔多出街，又唔多講嘢，人哋講嘢又唔多插嘴。不過當然，佢都有自己嘅缺點啦！就係衰在太過木無表情，無論你同佢講笑話、或者講啲好悲慘嘅事，佢都只會用一個好平淡嘅語氣話：「好～好～笑。」或者「好～慘～呀。」見到佢咁嘅反應，大家都笑破肚皮，佢身邊嘅朋友就同小小So講笑話：「佢係咁㗎喇！中咗三千萬六合彩都唔識笑；就算個天跌落嚟，佢都唔識驚，真係畀佢激死。」
朋友仲話Yumi除咗唔識表達感情之外，亦都唔太識路：「有次佢要搭港鐵由將軍澳去尖沙咀，佢竟然打嚟問我要搭邊個方向，我叫佢睇水牌，佢竟然都睇唔明，打嚟問我十幾次，最後我足足用咗半個鐘，先令佢搞清楚邊條線打邊條線！」Yumi連咁簡單嘅搭車「生存技能」都唔識，怪唔之得佢連保護自己都有問題啦！