羅家英昨日出席代言的網上遊戲《反斗西遊》宣傳活動時，提到千嬅秘密結婚，他即笑對方是為轉運：「千嬅呢排又病又聲沙，所以梗係想沖喜吓啦！我信佢結婚嘅事係真，喺當地只要畀幾百蚊就可以即刻註冊結婚，香港亦會承認呢段婚姻！不過千嬅都好大勇氣，因為結婚唔係即興嘅！」
羅家英笑言若非跟汪明荃於賭城註冊，傳媒或不會留意當地，覺得自己無意間做了好事：「拉斯維加斯真係好方便！我之前查過，仲有好多神秘地方畀人結婚，不過我梗係唔會公開，費事封咗人哋後門！」他又指於香港亦可到佛門清淨地，找來國光法師作證婚人。
至於方力申說：「我會向千嬅補送賀禮，不過我驚佢冇請飲喎！（你呢？）我喺紅棉道結（婚）算，最危險嘅地方先係最安全！」而梁漢文則說：「咁多年朋友都戥佢開心，上次綵排見到佢，唔覺佢有咩唔同！不過會補送賀禮。」
容祖兒：結婚係好事，戥佢開心，沖喜吓都好！如果結婚，我一定唔會喺拉斯維加斯，想公開就會喺香港搞，如果唔係，冰島係唔錯嘅選擇！
官恩娜：佢哋幾郎才女貌，希望快啲生BB啦！（你呢？）我就唔急，不過結得婚嘅我都會生BB，希望40歲前結婚！
傅明憲：同兩個都熟！同千嬅以前係鄰居，嗰時有一齊食飯！（適婚時間？）佢哋開心咪得囉！（催佢哋生B？）證實咗先啦！
農夫：真嘅就恭喜佢哋！（佢哋太保密？）都唔會嘅，佢係長輩，唔講都應該嘅！（送咩禮物？）Rap首歌送畀佢啦！