楊千嬅與丁子高昨日被踢爆於本月11日在美國秘密註冊結婚，消息轟動娛樂圈！千嬅曾三番四次否認下嫁丁子高，更誓神劈願稱會公開婚訊，今次卻自打嘴巴！而據知新婚的丁子高昨日心情靚爆，大方向密友承認婚事！
千嬅被踢爆於本月在美國拉斯維加斯跟丁子高秘密結婚，消息令人震驚！昨日她一整日也足不出戶避見傳媒，而經理人公司發言人說：「暫時未有回應，千嬅今日唔使開工，不過聽日會出席《太陽計劃》活動。」而唱片公司的集團董事陳志光亦特別於昨晚由北京返港處理事件。
曾誓神劈願否認
另一邊廂，丁子高及其堂兄丁子峻一直未有接聽電話，但丁子高前晚出席GUCCI時裝派對，據場內人士爆料，指他前晚心情大靚，就算被追問到跟千嬅的感情事，他都風騷地說：「如果請飲一定預埋你！」當消息昨日曝光後，丁子高向密友大方承認已婚，通話期間談笑風生，十分開心，明顯難掩新婚的喜悅！而盛傳是「高楊戀」媒人的Ronnie，昨日接受電話訪問時說：「我要再一次澄清，佢哋分別係我朋友，不過唔係我介紹，我都係睇報紙先知消息！」
網友驚訝有撐有彈
今年35歲的千嬅，跟30歲的丁子高拍拖兩年，曾傳出因趕生B而急於6月在上海舉行婚宴，但一直未獲證實，加上千嬅早前在多個活動上否認有「嫁期」，更誓神劈願指如果結婚的話，一定會公告天下，可惜她婚後仍掩飾「丁太」身份，堅稱以事業為重！她於本月20日在活動上，更斷言指結婚及生仔兩件事都不會在今年內發生！
對於千嬅突如其來的婚訊，網友大感驚訝！雖然不少人留言祝賀，但亦有人力斥千嬅「大話西遊」：「有少少對千嬅失望，結婚做咩唔講，喜事嚟，搞到份人好假！」但亦有人為她解畫：「有時藝人有合約喺身，係唔可以胡亂公開結婚消息，所以都明白千嬅點解唔公開！」
文：音樂組