鄭希怡：「大傻哥係我偶像！以前細個睇戲好驚佢，覺得佢好惡，壞人形象深入我心，雖然角色好衰，但真人好有義氣，所以封佢做偶像。兩年前我哋一齊做遊戲節目，第一次見面，雖然佢唔識我，但好Nice同我傾偈，覺得佢好可愛好傻氣，對佢印象好好，依家佢走咗，我好唔開心，但對一個同病魔搏鬥咁耐嘅人，呢個係一個解脫，希望佢喺天堂會開心。」
曾與成奎安以「契爺」、「契女」相稱的陳淑蘭：「我17歲選美就識佢，本來以為佢今次可以大步檻過，前晚瞓唔着上網知道佢走咗，好難過，不過見佢之前咁辛苦，都希望依家係解脫。」
李修賢：「早啲去都好，冇咁辛苦，佢嘅屋企人亦唔使太痛苦，呢段時間都有去探佢，佢瘦得好厲害，之前佢由浸會搬去養和嘅時候，醫院都話只得一個星期命，我同佢由83年開始合作，好難過。」
謝天華：「喺《古惑仔》第一集時已經合作，好可惜，演藝界又少咗個代表人物，令我諗到幾有錢嘅人都好，都好難同病魔鬥，之前佢康復中嗰陣見過佢一次，無奈又復發。」
陳小春：「傻哥係圈中義氣仔女，重朋友，收到志偉通知時，我心裏面好難過，希望佢家人節哀順變。」
陳法拉：「有欣賞過佢部分作品，佢離開真係好可惜，令我覺得身體健康好重要，尤其係藝人要特別小心身體。」
葉翠翠：「記得有一屆港姐，佢問啲女仔問題，仲扮到好惡，不過其實佢好好人，少咗個專業演員好可惜。」