方大同、薛凱琪（Fiona）與房祖名的三角關係已糾纏多年，前晚方大同在灣仔會展舉行《Timeless Live in Hong Kong》，緋聞女友薛凱琪相約鄭融及周柏豪等捧場，更與房祖名排排企，似乎這場「爭奪戰」已分出勝負！

本月初，Fiona撇下祖名，與富貴TB密友開派對慶祝生日，似乎已跟他分手，但前晚二人又排排企睇騷，看來又雨過天青。不過，Fiona明知有大批記者在場，故找來好姊妹鄭融做「電燈膽」，隔開她與祖名。記者要求二人合照，祖名起初扭擰婉拒，反而Fiona大方起身，為免令她尷尬，祖名只好主動走近Fiona身邊，其後更索性調位與她排排坐，演唱會期間，二人經常咬耳仔，又齊齊起身跳舞，非常合拍！不過，二人最終還是貫徹低調作風，前後腳離開，祖名在完騷前十分鐘率先離場，而Fiona則睇足全場才盡興而返。

眼見祖名攞足彩，方大同亦不甘示弱，以五種樂器盡騷音樂才華，又落台走到Fiona面前大唱情歌《Love Song》及《愛愛愛》，氹得她笑逐顏開，擺明向祖名示威！

Fiona（右起）相約好友鄭融及周柏豪做「電燈膽」，企圖擾亂視聽。	Fiona大方起身準備與祖名合照，怕醜的祖名見狀亦只好配合。	Fiona周圍走Social，被撇下的祖名不知所措，表情尷尬！

梁詠琪撐正生學生

至於梁詠琪與友人結伴睇騷，對於被指婉拒出席關心妍（Jade）為正生書院籌款的音樂會，她說：「我暫時仲係出席，根本冇人Update過我，我應承咗Jade去做嘉賓，籌到嘅錢係用嚟買電腦畀學生，好有意義。（正生會被查，怕唔怕敏感？）公司比較緊張，會留意事態發展，唔方便評論太多！」