四大天王的感情生活多姿多采，張學友與羅美薇結婚多年，幸福美滿；黎明與樂基兒熱戀四年多，感情穩定；華仔近日默認朱麗倩的「華嫂」身份；連同城城與熊黛林這一對，四位天王嫂難得「歸位」，本應可喜可賀！不過身邊女伴頻轉的城城，被指六月時與「霸王硬上杧」事件女主角王秀琳（Mango）暗中撻着，指Mango到訪城城家及雙雙祭五臟廟，之後城城以百萬戰車接送她返香閨，「同車」斷正，嚇得Mango立即落車而逃，非常狼狽！

「新城嫂」風騷見人

出道8年的Mango星運麻麻，數年前涉嫌被尹天照「霸王硬上杧」事件，直至近日她簽約Hong Kong Star唱片公司及將推出新專輯，近來經常以性感打扮示人，事有湊巧，每當她出新碟時，便有新緋聞曝光，認真「巧合」！未知是否「升呢」做「新城嫂」，Mango前晚出席酒會，表現風騷！記者致電Mango，手機轉駁至留言信箱，其經理人Andrew強調城城與Mango是朋友：「冇特別，我唔知佢哋突然咁Friend。（拍拖？）唔答。」他透露Mango生病：「唔係好嚴重。（傳佢快出碟借城城宣傳？）咁好？如果有咁好宣傳都唔錯。」反觀去年高調攻「城」33.5小時慶祝生日的Lynn，斯人獨憔悴，屢傳「分」訊。對於城城的新緋聞，Lynn的經理人Kim說：「Lynn喺上海拍緊《葉問2》，發緊燒，唔想打擾佢，冇回應，佢呢幾日唔會返香港，下月頭要去北京做嘢。」

而城城的經理人小美則SMS回應：「呢件事真係小事一則，係好普通嘅社交和紳士風度，我唔明點解值得咁大驚小怪？會唔會有啲小題大做呢？希望大家宏觀一啲去睇事情，交朋友亦不應分等級，或者紳士風度係開始會畀人誤解吧！但姑勿論係點，大家不必想得太複雜，唔值得成為話題！」