張敬軒、黃曉明、陶喆與謝安琪前晚出席《周大福鉑金巨星夜2009音樂會》。軒仔表示得悉2R的黃婉君（Rosanne）年底披嫁衣：「佢未婚夫係藍籌股。（你係咩股？）屁股囉！（唔值錢？）人人都需要，勁過藍籌！」他透露會送水晶牙給對方作禮物，問到會否接受閃電結婚？軒仔說：「會！啱就嚟o架喇！」他還自爆張母多次安排相睇，但全部遭他拒絕，笑言有意存精搵代母生仔：「想搵黑人，生出嚟個BB可以唱R&B，但阿媽話如果搵就斬我九碌！其實做我女朋友都幾難，因為阿媽係處女座，唔想有婆媳慘劇發生！」

黃曉明跳辣舞遭胸襲

同場的曉明首次以歌手身份來港參與音樂會，與女舞蹈員大跳辣身舞，期間更被摸胸，台下歌迷即起哄，問到獻唱有否壓力？曉明說：「沒有緊張及壓力，因我不是專業，想唱就唱，當然是唱現場。（有冇走音？）絕對沒有！」特別來港演出的陶喆被問到有指黃栢高因風水陣令旗下藝人病痛多，他說：「我台灣公司都好多變化，呢個7、8月都唔係好月，又台灣水災又豬流感！」