早前經常以師姐身份教訓師妹尹蓁晞（Yumi）的趙碩之（Wylie），未知是否做慣「大家姐」，與陳偉霆（William）、江若琳、鄭融、周秀娜及Square成員何尚謙（James）等拍攝電影《關人7事》期間，據知亦因三宗罪遭同片演員群起杯葛！

據幕後工作人員透露，Wylie拍攝《關》片時與其他演員鮮有交流，連打招呼亦欠奉，予人感覺甚為大牌，由於同片新演員較多，相對較「好戲」的Wylie即不時藐視有人演技未夠班，當中拍攝一場與William及鄭融的攤牌戲時，她更突然爆粗，令William及全場工作人員嚇至目瞪口呆。

彭發直指行為過激

有關Wylie的是是非非，導演彭發證實確曾聽到她爆粗：「佢爆粗嗰下我都嚇咗一跳，心諗使唔使咁激……不過可能佢想投入角色啫！」彭發又表示雖然未有留意Wylie是否被孤立，但卻直指她有缺點：「佢份人有啲執着，有時成班演員圍讀（劇本），Wylie會有好多自己嘅見解，搞到其他演員唔知點接，佢嘅對手主要都係William同鄭融。」

就此聯絡被爆粗相待的William，問到是否被Wylie嚇窒時，他竟自稱與對方對手戲不多，務求與「之」劃清界線：「我冇印象佢有爆粗，我同佢對手戲唔多。」至於江若琳及曾與Wylie傳不和的周秀娜，則以「與Wylie沒有對手戲」為由，拒絕回應事件。反而James則坦言與Wylie冇乜偈傾：「我哋有打招呼，不過等埋位時就好少傾偈。」

揚言冇偈傾好正常

對於種種指控，Wylie經理人Angus回應：「好愕然！其實Wylie爆粗只係配合劇情同現場氣氛。至於話佢同其他人冇偈傾就仲冤枉，佢淨係同William同鄭融有對手戲，同其他人冇偈傾好正常，而且佢唔想因為傾偈影響拍戲情緒。（但William話同佢冇乜對手戲！）大家睇法唔同啫！」Angus又透露Wylie自己的演技有待改善，故絕不可能自覺有資格藐視任何對手。

另外，與Wylie同公司的戴夢夢昨日表示獲老闆林建名增加資源讓她獻唱快歌，問到是否因公司正雪藏Wylie及Yumi，故將資源轉投給她，她說：「梗係唔係！我哋平時四個女仔一齊出席活動，依家冇咗兩個，手頭上八個Job就損失咗六位數喇！」