為慶祝入行8周年，S.H.E將舉行《S.H.E Is The One愛而為一》世界巡迴演唱會，首站定於10月16及17日在港舉行，第三度舉行巡迴演唱會的她們透露，為帶給歌迷新鮮感，舞台、歌衫及歌曲將全新改造：「今次舞台好勁，用成千萬做咗個無重力飄浮舞台，連樂手都喺埋上面，今次真係搏老命兼豁出去做到最好。」

名師設計舞衣

日前她們化身星星、月亮、太陽拍攝個唱海報，當攝影師要求攬攬時，由於衣服利用特殊金屬紙質物料製成而造成相距，Selina說：「應該係工作人員刻意安排，怕我哋靠近講悄悄話！」Ella透露花逾百萬港元邀請著名設計師Tomas Chan操刀設計歌衫：「今次好榮幸搵到Tomas Chan，佢會幫我哋打造成熟韻味。」

將於10月31日生日的Selina透露，屆時會在工作中度過：「當晚喺上海八萬人體育館開騷，同歌迷度過生日。」她們又透露個唱名稱是她們與唱片公司及製作單位商討出來，由於以愛為主題，問到是否渴望愛，Selina說：「我哋能夠一齊8年，仲要第三次舉行巡迴演唱會，應該破晒紀錄，我哋能夠行到今日都係因為愛。」