模特兒出身的周柏豪出道即與鄭融、Janice Man、薛凱琪及江若琳等傳緋聞，可惜全不是他那杯茶，日前記者在時代廣場戲院發現戴Cap帽的柏豪，與戴漁夫帽的Zelia排隊買戲飛。只見柏豪和Zelia有講有笑，當轉身搭電梯上戲院時，男方刻意耷低頭以帽遮面免被人認出，兩小時後，睇完戲的兩人急促到停車場取車，趁冇人時即十指緊扣。

還以為做柴可夫的柏豪接載女友返歸繼續「盡興」，估不到二人驅車到大坑歎下午茶，女方細心為他篤檸檬，兩人不避嫌一碗麵兩份食，期間突然伸出手研究掌紋！此時，警覺性超高的柏豪發現記者在場，拍拖斷正的他即埋單鬆人，並着女友先上車，記者尾隨追蹤，柏豪為擺脫記者，在東區走廊突然踩油加速，最後成功「運走」女友。

周柏豪和Zelia互摸手仔研究掌紋，更一碗麵兩份食，態度親暱！

放大圖片

拍MV鼻貼鼻燃愛火

原來有「翻版徐子淇」之稱的Zelia，曾擔任柏豪新歌《夠鐘》MV的女主角，當中有鼻貼鼻的親暱行為，末知是否「一貼」擦出愛火，日前兩人更一同出席公開活動，縱使現場還有同公司的鄭融、董敏莉及多位模特兒，但熱戀中的兩人眼中卻只有對方，不時互相偷望。

本報早前曾踢爆柏豪在新歌《Lovin' You》憑歌寄意，當時他承認是寫給一個圈中女子，但不肯透露對方身份，只以「可能係模特兒或者同公司藝人」，Zelia正是與他同經理人公司及模特兒，認真不謀而合。

同樣戴帽的周柏豪和Zelia去睇戲。

當發現記者時，周柏豪即駕車送走Zelia。