在書展、動漫節期間聲勢直逼周秀娜的尹蓁晞（Yumi），自被揭與髮型師男友酒店過夜及被影射援交後，雖然她事後聲淚俱下極力否認，但負面新聞仍接踵而來，包括與同門師姐趙碩之互寸、被指低價擔任龍友模特兒等，令Yumi形象直線下滑。
雖然Yumi經理人公司決定將她掟入雪櫃以淡化事件，不過原本由Yumi代言的Online Game《反斗西遊》，昨日官方網站竟宣布由八模兵團的A.Lin擔任新代言人，故一度盛傳Yumi因形象問題，遭A.Lin「冷手執個熱煎堆」搶飯碗。
雪藏期停工
對於Yumi的Online Game代言人身份被抽起，Yumi經理人Angus昨日承認其事，但強調過程中未有發生不愉快事件：「我哋同嗰間公司簽咗一年約，但自從Yumi嗰單新聞（酒店過夜）出咗街後，我哋一直有通電話，由於明白到係非常時期，所以我哋協議暫時停止今次嘅合作。（使唔使賠錢？）唔需要，而且唔排除之後仲有合作機會，Yumi本身都係幫呢間公司做Game Girl出身嘅。（點睇A.Lin擔任新代言人？）幾好呀！佢咁靚女。」Angus又強調Yumi的Online Game代言人身份雖被暫時抽起，其他工作未有受影響：「其實一路都有好多人搵Yumi做嘢，只因佢依家係雪藏期，我哋唔畀佢再接Job！」
寸形象唔健康
被指搶飯碗的A.Lin暗寸Yumi形象不夠健康：「無論係咪代言人，做藝人都要對自己嘅言行負責。」而Gamania發言人亦拒絕透露詳情：「總之合約代言人嘅形象一定要健康。」另外，A.Lin最近還接拍Samsung相機廣告及成為Norton防毒軟件代言人，早前又曾拍住同門模特兒DaDa 為Xbox 360出席宣傳及代言活動，加上以三點式造型拍攝的詩琳纖體廣告，接Job接到手軟。