唔好以為四個女仔都斯斯文文，但玩起上嚟真係好投入，更加唔會理會儀態，經常笑到擘大個口，小小So收到風，出名主意多多嘅GiGi，成為咗佢哋呢班好朋友之間嘅遊戲組組長，基本上GiGi任何類型嘅遊戲都識玩，所以每次聚會，GiGi都會絞盡腦汁諗啲新奇又刺激嘅遊戲同大家玩，而且多數會玩啲大人細路都啱玩嘅智力遊戲，每次都玩到嘩鬼叫好興奮。

小小So仲知道，貪玩嘅李心潔有次嚟香港同三位好朋友見面，佢仲特登提早一日嚟，因為心急同大家玩，可想而知啲遊戲幾咁吸引；幾個女人聚埋一齊無所不談，小小So知道佢哋試過由Lunch Time傾到Tea Time，直至傾到間餐廳打烊都有講唔完嘅話題，認真瘋狂！