「E Cup乳模」鍾蕙芝（Lavina）與「廚房妹」胡心諾（Rainbow）成功上位，卻換來是非成籮，Lavina坦言曾被負面新聞激到喊，而Rainbow則被朋輩疏遠，認真陰功！
屬同一間經理人公司的Lavina與Rainbow，早前被指聯手「明恰」E Cup Baby劉欣宜，因E Cup身材被對方視為勁敵的Lavina，早前被暗寸態度差後反擊：「佢話唔係我，但新人又身材好，唔係話我唔知話邊個！」她坦言工作壓力很大，心靈受創：「睇到網上好多對我嘅評論，有啲負面嘢令我唔開心，試過匿埋喊，對依家嘅工作冇乜安全感，擔心o靚模只係新興熱潮，大家一陣又會唔記得。」她深明不進則退的道理，現已積極自我增值：「我已經完成理工大學副學士，希望讀埋個Degree，同報讀演藝學院短期課程，我會盡力，但亦有輸得起嘅精神，如果之後發展唔好，亦會做其他嘢。」
靠好姊妹支持
Rainbow的態度則較溫和，否認搞小圈子：「同佢（劉欣宜）唔係太熟，只係工作上傾兩句，我哋冇蝦人！」她直言爆紅後壓力很大，還被同學排擠：「本來有啲同學以前係好好朋友，但依家覺得唔同咗，多咗人講是非，好彩仲有Monique（翻版阿Sa周凱盈），佢都係我同學，一直喺身邊支持我。」她自知懶音太多，有待改善：「依家努力讀報紙，之後會讀夜校，繼續進修。」
Lavina
年 齡：21歲
三 圍：34E、25、36
身 高：166cm
體 重：50kg
學 歷：理工專上學院廣告設計副學士
演出經驗：SONY相機廣告、《美女廚房》
密密曝光儲人氣
極速爆紅的Lavina與Rainbow各有賣點，靠方力申緋聞上位的Rainbow青春無敵，而Lavina則大賣E Cup暴乳身材，加上曾先後參與《美女廚房》中的「美少女廚神」環節及SONY PS3網劇《夏之盛放》，曝光率爆燈！
Rainbow
年 齡：17歲
三 圍：32B、24、32
身 高：164cm
體 重：47kg
學 歷：中四
演出經驗：亞洲遊戲展AGS 2008（Game Girl冠軍）、安信信貸、《美女廚房》